لاہور : سابق اولمپین زاہد شریف نے دعویٰ کیا ہے کہ ہالینڈ میں جاری چیمپئنز ٹرافی میں پاکستان اور بھارت کا پہلا میچ فکس تھا ۔

میڈیا رپورٹس کے مطابق ہاکی کے سابق کھلاڑی اور اولمپین زاہد شریف نے الزام عائد کرتے ہوئے کہا ہے کہ ہاکی چیمپئنز ٹرافی کا پاک بھارت میچ فکس تھا۔ انہوں نے الزام لگایا کہ میچ فکسنگ میں بھارت سے کوچنگ کرکے آنے والے ہیڈ کوچ رولنٹ آلٹمنز نے اہم کردار ادا کیا ہے۔

زاہد شریف نے کہا کہ میچ ہارنے والی ٹیم کے گول کیپرکو باہر بلایا جانا ’ فکسنگ ‘ تھا۔ انہوں نے چیف جسٹس، آرمی چیف اور صدر پاکستان سے تحقیقات کرانے کا مطالبہ کیا ہے۔

خیال رہے کہ ہاکی چیمپئنز ٹرافی میں 6 ٹیمیں حصہ لے رہی ہیں۔ پاکستان اور بھارت کے مابین کھیلے گئے میچ میں بھارت نے قومی ٹیم کو 4 صفر گولزسے شکست دی تھی۔