ویسٹ انڈیز: ویسٹ انڈیز کے مشہور آل راونڈر ڈوین براوو نے انٹرنیشنل کرکٹ سے ریٹائرمنٹ کا اعلان کر دیا ہے۔

ڈوین براوو نے اپنے ایک بیان میں کہا کہ وہ آج تمام طرز کی بین الاقوامی کرکٹ سے ریٹائرمنٹ کا اعلان کررہے ہیں۔ان کا کہناتھا کہ 14 سال قبل جولائی 2004 میں انگلینڈ کے لارڈز گراونڈ میں پہلا میچ کھیلا جس میں میرون کپ حاصل کی جو کہ انھیں آج بھی یاد ہے۔۔

ان کا مزید کہنا تھا کہ میں نے لمبے عرصے کرکٹ کھیلنے کے بعد ریٹائرمنٹ کا فیصلہ کیا ہے اور اب نئی نسل کو آگے آنے کا موقع ملنا چاہے۔ڈوین براوو نے 2015 میں ٹیسٹ کرکٹ سے ریٹائرمنٹ کا اعلان کیا تھا تاہم وہ ایک روزہ اور ٹی ٹوینٹی میچوں میں اپنے ملک کی نمائندگی کرتے رہے تھے۔ان کاکہنا تھا کہ میں نے اپنے پورے کریئر میں جوش و جذبے کے ساتھ کرکٹ کھیلی۔

ڈوین براوو نے اپنے کیریئر میں 40 ٹیسٹ میچ، 164 انٹرنیشنل ون ڈے اور 66 انٹرنیشنل ٹی ٹوینٹی میچز کھیلے۔ڈوین براوو نے اپنے کریئر کے ایک روزہ میچوں میں 25.36 کے اوسط سے 2,968 رنز بنائے اور 199 وکٹیں حاصل کیں جبکہ 40 ٹیسٹ میچوں میں 31.42 کی اوسط سے 2,200 رنز بنانے کے علاوہ 86 وکٹیں بھی حاصل کی اور انٹرنیشینل ٹی 20معرکوں میں 24.29کی اوسط کے ساتھ 1142بنائے اوربولنگ میں 52شکارکیے۔