لندن: پاکستان کرکٹ ٹیم کے باﺅلنگ کوچ اظہر محمود فاسٹ باﺅلر محمد عامر پر اس وقت پر سخت برہم ہیں اور انہوں نے کہا ہے کہ باﺅلر امیدوں پر پورا نہیں اتر رہے۔

تفصیلات کے مطابق دورہ انگلینڈ پر موجود قومی ٹیم کے کینٹر بری میں کینٹ کاﺅنٹی کیخلا ف میچ کے بعد میڈیا سے گفتگو کرتے ہوئے اظہر محمود لیف آرم پیسر پر پھٹ پڑے اور کہا کہ محمد عامر مسلسل ٹیم کا حصہ ہیں لیکن وہ کارکردگی دکھانے سے قاصر ہیں جن کی ان سے امید کی جا رہی جبکہ فاسٹ باﺅلر کو اپنی کارکردگی سے خود کو منوانا ہوگا۔

باﺅلنگ کو چ نے مزید کہا کہ محمد عامر کی جب سے ٹیم میں واپسی ہوئی ہے وہ خاطر خواہ کارکردگی دکھانے میں ناکام رہا ہے اور یہ بات بھی صحیح ہے کہ اس کی ٹیم میں 5 سال بعد واپسی ہوئی تھی۔

ان کا کہنا تھا کہ باﺅلر کو چاہیئے کہ اب ذمہ داری دکھا کر ٹیم کیلئے وکٹیں حاصل کریں،اگر وہ ہماری طرف سے باﺅلنگ اٹیک کا قائد ہے تو اسے اپنی کاکردگی دکھانی ہوگی اورمجھے یقین ہے کہ وہ ایساکرسکتاہے۔

خیال رہے کہ قومی کرکٹ ٹیم اس وقت دورہ انگلینڈ اور آئرلینڈ کیلئے انگلینڈ میں موجود ہے جبکہ اس کا پہلا پریکٹس میچ کینٹ کیخلاف بارش کی وجہ سے بغیر نتیجہ ختم ہوگیا تھا۔