کشمیری نوجوان کاشف علی نے میلہ لوٹ لیا، فتح گر سنچری اسکور کی

راولاکوٹ ہاکس کی ریکارڈ ہدف کے کامیاب تعاقب کےساتھ فائنل تک رسائی

میرپور رائلز کے شرجیل خان کی کشمیر پریمیئر لیگ میں تیز ترین سنچری

مظفرآباد ٹائیگرز اور راولاکوٹ ہاکس فائنل میں آمنے سامنے

کشمیر پریمیئر لیگ کے دوسرے ناک آوٴٹ میچ میں غلطی کی گنجائش نہیں مگر ٹاس کے وقت راولا کوٹ ہاکس کے کپتان شاہد آفریدی میرپور رائلز کو بیٹنگ دینے کی غلطی کر بیٹھے۔ شرجیل خان اور مختار احمد نے اس فیصلے کا بھرپور فائدہ اٹھاتے ہوئے سات اوورز میں 74 رنز بنا دیے۔ اسی اوور کی آخری گیند پر شاہد آفریدی نے مختار احمد کو اسٹمپڈ کروایا جنہوں نے 17گیندوں پر چار چوکے لگاتے ہوئے 21رنز بنائے۔ کپتان شعیب ملک اس مرتبہ زیادہ دیر وکٹ پر قیام نہ کرسکے اور ایک اچوکا اور چھکا لگاتے ہوئے 15رنز کے ساتھ زمان خان کی گیند پر بولڈ ہوئے۔ جارحانہ انداز کے حامل شرجیل خان نے ایسے وقت یادگار اننگز کھیلی جب ان کی ٹیم کو سب سے زیادہ ضرورت تھی۔ شرجیل خان نے 46گیندوں پر کشمیر پریمیئر لیگ کی تیز ترین سنچری مکمل کی اور پھر یہیں اکتفا نہیں کیا بلکہ آخری اوور میں آوٴٹ ہونے سے قبل صرف 63گیندوں۔ پر 12چوکے اور 12چھکے لگاتے ہوئے 141رنز کی ہنگامہ خیز اننگز کھیلی۔محمد اخلاق نے 21 گیندوں پر دو چوکے اور دو چھکے لگاتے ہوئے 29رنز بنائے۔ میرپور رائلز نے بیس اوورز میں 236/4 کا ریکارڈ مجموعہ حاصل کرلیا۔ زمان خان نے دو کھلاڑیوں کو آوٴٹ کیا۔

راولاکوٹ ہاکس کو فائنل تک رسائی کیلئے کشمیر کے پہاڑوں سے بھی بلند ہدف حاصل کرنا تھا اور ابتدائی اوورز میں ہاکس کی پرواز بھی اونچائیوں کو نہ چھو سکی۔ زخمی احمد شہزاد کی جگہ اننگز کی ابتدا کرنے والے عمر امین پہلی ہی گیند پر ثمین گل کی بولنگ پر وکٹ کیپر محمد اخلاق کے ہاتھوں کیچ ہوگئے۔ بسم اللہ خان (15) نے ایک چھکا ضرور لگایا مگر وہ جلد ہی مختاراحمد اور عماد بٹ کے گٹھ جوڑ کا نشانہ بن گئے۔ پاورہٹنگ کیلئے آنے والے عمران رندھاوا(13) بھی 11 گیندوں کے مہمان ثابت ہوئے جنہوں نے ایک چوکا اور ایک چھکا لگایا۔ چوتھے اوور میں 34/3 پر کاشف علی اور حسین طلعت کی جوڑی وکٹ پر یکجا ہوئی تو نہ صرف وکٹیں گرنے کا سلسلہ رک گیا بلکہ 65 رنز کی شراکت نے امیدوں کے چراغ بھی جلا دیے۔ حسین طلعت کی جارح مزاجی اپنے عروج پر تھی جنہوں نے 22گیندوں پر سات چوکے اور دو چھکے لگاتے ہوئے 51 رنز کی طوفانی اننگز کھیلی۔ آغا سلمان کی گیند پر مختار احمد کے کیچ نے حسین طلعت کو حیرت زدہ کرتے ہوئے 119 کے اسکور پر پویلین روانہ کردیا۔آخری دس اوورز میں جیت کیلئے 119رنز درکار تھے مگر دانش عزیز (6)جلد ہی کاشف علی کا ساتھ چھوڑ گئے۔ شاہد آفریدی نے میدان میں قدم رکھتے ہی جارحانہ انداز اپنا لیا جس کی بدولت پندرہ اوورز میں راولاکوٹ ہاکس 170تک پہنچ گئی۔ سولہویں اوور میں 17رنز کا اضافہ ہوا تو میرپوررائلز کے بولرز کے اوسان خطا ہونا شروع ہوگئے۔ اگلے اوور کی پہلی ہی گیند پر شاہد آفریدی تین چوکوں کےساتھ 19رنز بنا کر آوٴٹ ہوگئے مگر نوجوان کاشف علی جیت اور میرپور رائلز کی راہ میں دیوار بن چکا تھا۔ صرف 51 گیندوں پر نو چوکے اور آٹھ زوردار چھکے لگانے والے کاشف علی نے 114*رنز کی یادگار اور فتح گر اننگز کھیلتے ہوئے بیسویں اوور کی چوتھی گیند پر 237/6کے اسکور کے ساتھ راولاکوٹ ہاکس کو فائنل میں پہنچا دیا۔ میرپوررائلز کی جانب سے عماد بٹ نے تین اور ثمین گل نے دو کھلاڑیوں کو آوٴٹ کیا۔