فاٹا: قومی کراٹے ٹیم کے کھلاڑی عبدالصمد نامعلوم افراد کی فائرنگ سے جان کی بازی ہار گئے ۔

میڈیا رپورٹس کے مطابق فاٹا کراٹے ایسوسی ایشن کے جنرل سیکریٹری اور کیوکیشن کراٹے کے بین الاقوامی کھلاڑی عبدا لصمد آفریدی نامعلوم افراد کی فائرنگ سے جاں بحق ہوگئے۔

قومی کراٹے ٹیم کے کھلاڑی عبدالصمد آفریدی گاڑی میں جارہے تھے کہ ضلع خیبر کے علاقے شاہ کس کے مقام پر نامعلوم افراد نے ان کی گاڑی پر فائرنگ کردی جس کے نتیجے میں وہ شدید زخمی ہوئے جب کہ عبد الصمد آفریدی کو فوری طور پر پشاور کے حیات آباد میڈیکل کمپلیکس منتقل کیا گیا جہاں وہ جانبر نہ ہوسکے۔

خیال رہے کہ عبدالصمد نے کئی بین الاقوامی مقابلوں میں پاکستان کی نمائندگی کی جب کہ حال ہی میں آذربائیجان کے شہر میں باکو میں منعقد ہونے والی ورلڈ کیوکشن کراٹے چیمپئن شپ میں پاکستان کی نمائندگی کی تھی۔پولیس حکام کے مطابق قاتلوں کی گرفتاری کے لئے کارروائی کا آغاز کردیا گیا ہے اور بہت جلد قاتل قانون کے کٹہرے میں ہونگے۔