قومی کرکٹ ٹیم کے سابق محمد حفیظ نے آئی سی سی کے دہرے معیار پر اپنی ناراضگی کا اظہار کرتے ہوئے مطالبہ کیا ہے کہ اس بین الاقوامی کرکٹ میں جتنے بھی آف سپنرز ایکشن میں ہیں ان سب کا بائیومکینیکل ٹیسٹ کروایا جائے تاکہ دودھ کا دودھ اور پانی کا پانی ہوجائے
حفیظ کے مطابق کرکٹ بورڈز کی طاقت ہے جس کے خلاف کوئی بولنا نہیں چاہتا، بہت سی جگہوں پر تعلقات آڑے آ جاتے ہیں جنہیں کوئی خراب نہیں کرنا چاہتا اور بہت سی جگہوں پر نرم گوشہ بھی اختیار کیا جاتا ہے
حفیظ نے حیرانگی کا اظہار کرتے ہوئے کہا سمجھ سے بالاتر ہے کہ 16، 17 اور 18 ڈگری کے باولنگ ایکشن کو انسانی آنکھ کیسے بھانپ لیتی ہے اور میرا 16 ڈگری کا ایکشن سب کو نظر آ جاتا ہے مگر 25-30 ڈگری کے ایکشن کسی کو نظر نہیں آتے
سابق کپتان ٹی ٹونٹی حیران ہیں کہ گزشتہ دو سال سے ان کو ٹی ٹونٹی ٹیم کی نمائندگی کا موقع ہی نہیں دیا گیا جبکہ وہ اور ان کی کپتانی میں ٹیم آئی سی سی رینکنگ پر حکمرانی کرتے رہے ہیں
محمد حفیظ نے مکی آرتھر کے بیان پر ڈھکا چھپا جواب دیتے ہوئے کہا کہ اگر کوئی سمجھتا ہے کہ بطور آل راونڈر ہی ان کی ٹیم میں جگہ بنتی ہے تو ضرور ٹیم آل راونڈر کو ہی شامل کیا جائے مگر اس سے پہلے بیٹنگ میں ان کی کارکردگی کا جائزہ لیا جائے اور پھر فیصلہ کیا جائے